今次要介紹既就係AMRUT威士忌，係一間印度所出產既品牌，亦都係印度首屈一指既酒廠，近年黎急速冒起，小編亦都想了解一番，過去聽到既印度威士忌，用糖漿發酵既酒液，都係負評為多，究竟AMRUT有咩特別，可以係雲雲酒廠當中脫穎而出?
AMRUT由Shri J.N. Radhakrishna Rao Jagdale 於1948年成立(當時為 Amrut Laboratories)。AMRUT既名其實係源於梵語，意思係"Nectar(花蜜) of the gods"，相信唔洗我多解大家都知係好味既意思，不過公司就將佢翻譯為"Elixir(靈丹妙藥) of Life"，感覺同
uisge beatha既生命之水有異曲同工之處。
成立初期，AMRUT並未生產威士忌，開頭都係以RUM酒、BRANDY作為銷售主打，去到1980年之後，先至開始加入單一麥芽威士忌既市場。
當時除左AMRUT之外，仲有好多唔同既印度蒸餾廠製作威士忌，不過原料同我地認識既好唔同，基本上只有少量(或者甚至冇)大麥、穀物，而其餘既都係糖蜜(molasses) [糖蜜係加工甘蔗或者甜菜製成食糖的過程之中既副產品，一般都係棕黑色黏稠液體]。咁算係咩酒? 小編都冇辦法去解答。印度亦唔受歐盟規管，所以好多當地既"威士忌"都係同我地認識既有分別，好多依D印式威士忌品質不一，受到好多各界既批評。
AMRUT蒸餾廠與別不同既地方就係效法蘇格蘭威士忌既做法，使用印度大麥同源自喜馬拉雅山脈既水源。大麥黎至於旁遮普邦 (Punjab)同拉賈斯坦邦(Rajasthan)，而麥芽處理廠位於齋浦爾(Jaipur)同德里(Delhi)。處理完成之後就會運到酒廠，位於邦加羅爾，約海拔 3000 英呎，天氣潮濕但炎熱，熟成速度同ANGEL SHARE都極高，約每年10-11%。所以出產既酒都熟於較為年輕既酒款，多數都冇列名年份。不過過去曾經有幾款酒係印度陳年一段時間之後，再運到蘇格蘭陳年，作法非常有趣。而依家AMRUT最高年份既作品就係Amrut Greedy Angel 8 Year Old。8年酒款，每年10-11%既ANGEL SHARE，屈指一算，約只會剩低原本既30%-40%，諗起都傷心。
去到2000年初，AMRUT打算打入歐洲市場，不過因為印度長遠而黎品質參差既形象令到佢地多次撞板，不過憑住高品質同用心營運，係轉換營銷戰略兩三年之後，終於成功打玻污名，進軍國際。
P.S. 係研究AMRUT期間已經發現原來印度威士忌佔全球既份額每年都不斷攀升，甚至連JOHNNIE WALKER, JACK DANIELS亦開始被印度超越，究竟威士忌五大產區之名係咪要變成六個呢?