痴線，人生咁幸福得唔得架 ?
Springbank 2001 - 2013 cask strength 12YO Batch 6 大師一黎就筍左呢款俾我地試試，想點先。
Glenallachie Oloroso 11YO 痴線，柔和甜美，香氣口感係一抺抺漸層式轉變，癲。
Glenallachie Peated Bourbon 16YO 做咩啫你~ 煙熏、奶油糖果、薑、杏仁、蜂蜜、煙盒，層層疊疊，如太極循環往復。 不同風格的東西融為一體而毫不突兀，各種特色鮮明又不會互相遮蓋， 平衡得妙到毫巔，大癲。 呢D係「手信」，我地原定係Nebbiolo加PX深度遊。 無啦，成晚計劃俾你攪灣晒啦， 食飯啦，完啦，完美啦，唔駛再飲啦。 好癲呀~~~~~ 即係咁，雖然係好正好完美，但酒就已經開左抖緊氣， 都要照顧下其他未到場，miss左呢個人間美味既朋友架嘛。 黎，wine time !
Angelo Negro - Roero Nebbiolo Angelin DOC 2021 先從輕鬆簡單既黎，玫瑰、水果糖、櫻桃，少女般的甜美氣息， 入口輕柔卻不失骨幹。酸度醒神，很不錯啊，而且襟擺，開瓶三個小時仍然堅挺，good。
Angelo Negro - Barbaresco Riserva Basarin DOCG 2015
來到Barbaresco，同樣的Nebbiolo，初熟的味道。
藍莓、皮革、紅棗、陳皮、甘草、黑朱古力等香氣。
輕柔漫舞，酸度高但不過於刺激，多汁，帶甘草香的長餘韻。
嫵媚誘惑得很。
Gianni Gagliardo - Barolo DOCG 2011 Bottle air了5小時，落杯是可感受到的鼓油、焦油，混和著清新的藍莓，配著點黑朱古力、提子乾，拆散開來可能很怪異，偏偏在這款酒上，香氣的輕重比例混和得很討喜。
厚身，亦頗滑溜。 少女到初熟到偏鋒，各有特色，非常滿足。 wine前真的是額外的驚喜，上過了天堂， 落回塵世品wine，也算七情六慾體驗過遍，沒有白走一趟。 再爽再滿足都要按原定試試PX。
平時D PX甜到癲，呢款又唔會太over，提子乾、五花茶。 配朱古力夾到爆，無野既，加埋一齊既「提子餅乾」咪就係瀨尿牛丸咁囉。 朱古力沾提子乾醬，正。 大家飲到痴痴地，講到夾野食，又話杯酒似五花茶，龜靈膏溝糖水， 呢D就咁車落去雪糕度又得，車落龜靈膏都襯喎，健唔健康就自己諗勒，哈哈哈。
Strathclyde 35 Year Old 1987 Single Cask (Master of Malt) 雪芳蛋糕、奶油、椰絲糖。總結就係以前酒樓一D糕點，上面佈滿椰絲既液體版。 餘韻絲絲椰香，好香呀。
Glenallachie future edition 4 yo 一聞果D煙燻已經引人入勝，令人訝異之處係口感既圓潤，60.2%但完全感覺唔到酒精感， 飲緊液體炭一樣，而餘韻亦非常長。 Billy Walker，真心跪。 一晚咁樣樣，仲可以講咩丫， 再講都係，「咁幸福得唔得架」? Cheers ~