13.01.2019 Whisky Now - 香港威士忌大日子
過去香港威士忌都已經有唔少既威士忌展覽，講特別既話我相信非WHISKY NOW莫屬!
點解會咁講? 要講到關於威士忌既展覽，最大型既莫過於1年1度既WHISKY FESTIVAL，當中參展商大多數都係酒廠代理商同大型酒舖以一D OB款式為主題既展覽，非常適合認識酒廠基本風味既一個展覽。
講番WHISKY NOW，酒展開始之前公佈既酒展名單已經係令人嘩然，參展商拎既酒款都係非一般既IB，香港唔會容易搵到之餘，仲要有一堆誇張舊酒老酒，實力唔會比其他國家大型威士忌展差，實在係香港既一個大喜之事。
WHISKY NOW既入場費只係需要$100蚊，抵到爛，雖然要自備酒杯，但依幾年既酒展已經送過好多酒杯，所以再送感覺上都冇乜意思。小編當日都預備左波波杯同GLENCAIRN入去一試老酒。除左飲酒之外，當中仲有Club Qing老闆 - Aaron Chan同Emmanuel Dron一場免費講座 - Identifying Fake Whiskies - An Introduction，去教大家分辨假酒既基本知識，當中講左關於GLASS CODE既分辨最為有趣，小編早前已閱讀過Emmanuel Dron 大師既 Collecting Scotch Whisky，認識又再深一層。講座完結既時候仲有一位收藏家拎佢既MACALLAN 10 YEARS向Emmanuel Dron請教，詳細GLASS CODE已經唔記得，只見大師隨口就可以講得出GLASS CODE為八十年代裝瓶商所用，真係嘆為觀止。
聽完講座都係時候開始入正題，今次展覽有成21參展商，官方酒展清單有成670枝，仲未計當日有既神秘BOTTLE，什為誇張。所有WHISKY都以15ML為單位，小編覺得安排非常好，起碼荷包淺薄既小編都可以飲到過萬蚊既VINTAGE BOTTLE，大部分攤檔都接受現金，少量仲接受PAYME同其他電子錢包，都尚算方便。
因為酒款太精美，會場人數非常之多(都幾熱)，大家買完一杯都不忘自拍同影下BOTTLE好好記錄一番，小編都花左D時候先可以迫入一檔入面欣賞同品飲唔同酒款，當中最鍾意既就係LAGAVULIN 12YO WHITE HORSE，酒體非常舒服柔順同平衡，彷彿靜靜坐係大海前，感受輕輕既海風。成個展覽，咩時候都係咁多人，去到最後，仲有唔少發燒友包底。奈何小編荷包緊絀，如果唔係我都真係想包底自己鍾意既BOTTLE，今年唯有儲儲錢，下年再戰! 更加希望下年WHISKY NOW比今年更加出色!
