【氈酒教學】氈調酒 (二) - Tom Collins的惡作劇

今次介紹另一款同樣係氈酒界別好有名氣的雞尾酒 - Tom Collins

就咁聽個名,會以為係根據呢隻cocktail的始創人的稱呼所命名,但其實係有段故:


相傳19世紀後期,係美國紐約同費城的酒吧好流行一個無厘頭的惡作劇:


朋友A會主動行埋去朋友B度問:「喂,識唔識一個叫Tom Collins的人?」


由於Tom Collins呢個名唔算好普遍,好多情況都係朋友B第一次聽到呢個名,所以朋友B好順理成章答:「唔識!聽都未聽過」


朋友A隨即就講:「阿B,你最好盡快搵佢出黎。因為我之前從呢個人口中聽到佢講你壞話,仲周圍同人唱你最擅長偷野,仲要乜都偷,無野會偷唔到。」


呢刻俾著你係朋友B, 你點都心慌慌。想像下身處係1874年的你,手機又無,互聯網又未出現,一下子俾人唱通街係賊,唔驚至出奇。相傳當時連報商都有份玩野,係報紙刊登Tom Collins的「頭像」。


既然想證明清白,朋友B唯有搵阿Tom Collins出黎對質,可惜TC係虛擬人物,點摷都摷唔到。而阿A就實係喱埋一邊笑騎騎,飲住酒,睇你出醜。(呢D真係夠朋友啦!)


不過,再醒目的人唔只係朋友A, 而係當時一個酒保。佢乘住周圍有人嗌Tom Collins呢個名,就將一杯自家製的雞尾酒改名為Tom Collins。


就此,每逢有人入酒吧要搵Tom Collins的時候,好不期然就落左order叫左杯野飲。最後,梗係人又搵唔到,仲要焗住埋單找數。你話係咪衰開有條路。


正正係因為一個無聊的惡作劇,成就咗Tom Collins呢杯cocktail。




Tom Collins呢隻雞尾酒的特性係清香並帶有檸檬酸味。鍾意飲有氣檸水的朋友絕對唔可以錯過。


配料:

60ml 氈酒

30 ml 鮮榨檸檬汁

15 ml 糖漿

2-3片薄切檸檬

蘇打水


做法:

1. 將冰塊裝滿雞尾酒shaker;

2. 把氈酒、鮮榨檸檬汁及糖漿倒入裝有冰的shaker;

3. 合上shaker並搖十至十五秒(視乎情況);

4. 將合成品倒進放有冰塊的Collins杯,並後加蘇打水;

5. 加上薄切檸檬作裝飾


登記成為Cheers Asia尊貴會員