top of page

【活動回顧】CA X YJ Tasting RD 1

打風前夕,唔係唔聚會飲返晚呀嘛? 7點,齊人,開波 。


又Wine又有威,梗係輕鬆野行先

1.Chateau Mihope Chardonnay Dry White Wine 2019 一如上月所試,熟黃色水果,混雜著堅果和顯著的火石,微微的蜂蜜隱藏其中。

口感圓潤,酸度舒適。 尾韻帶火石與些微提子乾香氣。 之前既聚會,講起白酒,有人唔鍾意,原因係覺得果陣酸味係「嘔吐物般既酸」。 其實都有D唔係咁sharp,帶D熟果、honey既白酒既,就好似呢枝咁。 2.Chateau Gruaud Larose 2000

天係咪將降大任我就唔知,但行弗亂其所為就好明顯,凡事一波幾十萬折,黑氣纏身都唔係浪得虛名。行走江湖,斷cork呢D少不免啦,粉碎到咁樣都真係好俾面。 無Ah so ,無牙簽,無decanter .Fine , 買個篩囉。

人窮就比較著重性價比,我成日同D新手朋友講,bordeaux野,算吧啦,我會形容佢係韓國女團,唔係唔正,個個纖腰長腿,正!不過無個噏得出名。 其實又唔係事實既全部黎既,當佢有返D年份,成長左就各顯特色,只不過,貴囉,新手入門,何必呢~ 而係眾多叫得出名既Bordeaux入面,個人認為Larose比較與眾不同,比較earthy 、wet leave 類既氣味。所以,既然忽略性價比,不如試枝更明確易認架啦。 擺係枱都聞到既香氣,

嘩,紅黑果、泥土、甘草、煙草、皮、肉、陳皮、雪松, 香氣混和得非常融洽。用我既自私杯聞香,非常集中且乾淨既雪松香, 係正中心點有一團香甜到漏汁既紅黑果氣團,不得了。 口感絲滑,酸度活潑,仍然long way to go . 配一口燒鴨,omg !果D酸度加埋陳皮味簡直有如酸梅醬既效果, 果層皮,果陣哄烤既香味,一絕 ! 有酒友都聞到D 菇、土地、青苔呀咁,個腦海中出現在D荒廢小屋,哈哈哈。 黎到「重」頭戲,落威啦 店主刻意而為,有普飲有特色,一連4款,慢慢比較感受。 威我都係小小小小小小小師弟,成晚又要食飯又要講,連飲都唔得閒, 記憶模糊,憶述得唔好唔好見怪。 1. Dalmore 15

Dalmore 15就唔講勒,完。 2.Bunnahabhain 7YO whiskyutopia 57.5%

好可惜,我對佢無乜印象,絕對唔係佢唔好,只係太忙....

(一邊食飯,一邊講下酒,所以嚴重落後進度/ . \)

香都未聞清楚,其他朋友仔已經下一杯,浪費左,罪過 ,罪過 !

3.Balvenie BURNSIDE 1996-2020/23年|HOGSHEAD|51.8%

睇Label 就明 ! 星空,果陣深邃, 一飲完,真係覺得自己慢慢升空,飄左出宇宙,唔識落返地。 都唔知自己係飲威定吸左毒,癲 ! 4.Littimill 28YO 49.2%

焦糖、梨味、香 料香氣。

柔滑口感。尾韻既麥芽香,真係,「浪漫」呀。

你地唔好嘈住我啦,阻住我"趙"麥芽呀 !


Wasmund's Rye Spirit

朋友買左個桶set ,潤桶用。 正喎,無敵既回魂酒,將我地係美好既酒鄉拖回現實,重重墮下。 今晚飲下wine又飲下威,買左堆零食試下配下。 威士忌既風味真係非常突出,真係好難再添加其他風味,再點樣增強。 純飲或者威真係俾到更多野你。 但係要食飯,或者party 配下野食,都係wine 易攪D。 酒無高低之分,都係場合心情姐。 有一班鍾意飲酒既人一齊飲,非常開心。 感謝YJ Whisky 既慷概,俾我地試到呢D有錢都未必飲到既靚野。 人生有個真正朋友的確好~極~,飲勝 !

0 則留言

最新文章

查看全部

Comments


bottom of page